كَلَاَمٌ عَلَى بَلَاطِهِ

كَلَاَمٌ عَلَى بَلَاطِهِ

بقلم : محمود البدوي 

نشرت بتاريخ 4 اغسطس 2020م 

بص يا سيدي ، عارفك زهقان وزعلان ومتضايق من كل حاجة حاصله حواليك ، حتى انك بقيت زهقان من نفسك ، وانا معاك في كده ، وكمان عارف انك بتقول انا محبوس ونفسي انزل وافك عن نفسي واروح الجامع او الكنيسة ، ونفسي انزل شغلي ، وارجع للمة القهوة ، واشوف اصحابي بالكافية ، وكمان وحشنا النادي ، ولمة الأهل والأحباب أيام الأجازة ، وانا كمان زيك .

بس تعالي نتكلم مع بعض بالعقل شوية ، الاحوال اللي بنعيشها هي قدر من عند ربنا ، لا دخل لنا فيها ، وزي ما حضرتك كمان عارف انها حكاية مش عندنا احنا وبس ، لأني حاسك ها تقولي البلد ازي سابت الموضوع كدة ؟ ، الحكاية اكبر واصعب حتى علي دول كبيره جداااااا واكيد حضرتك سمعت باللي حاصل في ( امريكا - اسبانيا - ايطاليا – الصين – روسيا و الخ ) واظن مفيش اكبر ولا اهم من الدول دي في الامكانيات والخدمة الصحية والأبحاث وكمان الاقتصاد والإمكانيات .

بس الأول قبل ما نتكم ليا عندك طلب – ممكن ؟ عايزك تحاول تخلع عن عينيك نظارتك السوداء القاتمة ، وأن تعيد تقييم الأوضاع من حولك مره اخري ، حاول تكون منصف وحقاني مره واحده لوجه الله تعالى ، وتعمل مقارنة بسيطة جدا بين ما هو حاصل في بلدان العالم المتقدمة والعظمى ، وبين بلدك الغلبانه اللي ماشية بستر ربنا ، واللي ساندها جهود ناس مخلصين ، وسهرانين بيشتغلوا ويفكروا في طريقة يحموا بيها مستقبل اولادك اللي في مراحل التعليم المختلفة ، ووده علشان يحافظوا على لقمة عيشك وحقوقك سواء كنت ارزقى على باب الله ، او موظف حكومي ، او موظف بالقطاع الخاص ، والأهم من ده كله الحفاظ على حياتك وهي اولي الأولويات لديهم ، وكمان بيفكروا في اخوك وعمك وابن اختك اللي مسافرين بره للسعي على لقمة عيشهم بالخارج ، واللي بلدك نجحت في انها ترجعهم تاني بعد ما سفارة بلدك كلمتهم كلهم وقالتلهم اللي عايز يرجع لمصر ها نرجعه ( العين دي زاد والعين دي ماء) ، وده بعد ما تخلت عنهم الدول اللي قاعدين فيها وقالتلهم بصريح العبارة كده وعلى بلاطه ( الأولوية لمواطنينا وحضرتك شوف مصلحتك وارجع بلدك احنا مش مسئولين عنك) ، حتى وصل الحال بإحدى الدول العربية انها قررت بيع الخبز للمواطن بكمية معينه ، بينما قررت بيع نصف ذات الكمية فقط للوافد اللي جاي يسترزق في بلدهم .

واظنك كمان سمعت عن بعض المتنمرين والكارهين والمتربصين بأخوتك المغتربين وتقدر ترجع للفيس بوك وتويتر وتشوف بيقولوا ايه عنك وعن بلدك ، بعد ما تناسي البعض منهم من ناكري المعروف افضال بلدك عليهم ، بعد ما كانوا مشتتين وبلدك فتحت دراعتها ليهم ، وجيشك راح حرر بلدهم بعد ما كانت مغتصبة ومحتله ، بس ده مش هو السبب في اللي حصل مع اهلك المقيمين هناك ، عارف سبب كده ايه ؟

سببه انه لقي حضرتك قاعد تشتم وتشكك في بلدك واجراءاتها وخدماتها صباح مساء وانتا قاعد فيها وبتأكل من خيرها ، منتظر منه يعمل ايه بعد ما وجدك بتشتم عليها كأنك عدوها اللدود ، منتظر منه ايه ؟

بص يا ابن الناس ، البلد دي مش بتجبر حضرتك انك تحبها ، ولا بتقولك اشكرني وقولي كلام حلو ، ولا عايزين منك اي حاجة اكتر من انك تكون منصف وانتا بتتكلم عنها ، وتقول كلمة حق زي ما ربنا امرك بأن تكون انسان صادق قولاً وفعلاً ، شوف حواليك ايه حاصل في باقي بلدان العالم في هذا الظرف الاستثنائي وما تم من تحركات وتدخلات بتلك الدول ، وما فرضته من اجراءات للتعامل مع تلك الأزمة ، وبين ما هو حاصل ببلدك الغلبانة اللي على قد حالها ، وقتها ها تعرف ان بلدك كبيرة قوي ، وبتحبك ، وبتعمل كل ما يمكن للحفاظ عليك وعلي مستقبل اولادك وعلي صحتك وحياتك انتا وكل حبايبك واهلك .

على فكرة مفيش اصعب من الجحود ونكران الجميل ، مفيش اصعب من انك تكون قاسي على اللي منك ، تخيل نفسك كده وامك بتعملك كل حاجة وسهرانه ليل نهار على خدمتك وانتا تيجي تفتري عليها ، ياتري احساسها ها يبقي ايه ؟ فكر فيها كده ، والله صعبه جدا جدا .

لو بعد ما فكرت في كل اللي حكيت فيه معاك ده ، ولقيت نفسك لسه برده بتفكر بأنانيه ، وتقولي طب وانا مالي يا عمنا ، ما هي الدولة ملزمه باللي بتعمله ، مش في دستور وقانون يلزموها بأنها تحمينا وتدافع عن مصالحنا ، ايه الجديد اللي بتعمله لينا يعني ؟ ، كفاية تطبيل بقي خنقتنا بكلامك ده ، متفتكرش ان الحكومة هاتديك رتبه ولا نيشان على محلستك دي !

انا معاك والله في اللي بتقوله وعارف ان الدولة مش ها تديني رتبه ولا نيشان ، ولا انا اصلاً منتظر حاجة منها ، بس كفاية انى عايش فيها ، لأنى كل ما بشوف الأوضاع في باقي الدول اللي كانت الناس غاية حلمها انها تروح تمسح بلاط أو تغسل صحون في بلدان زي أمريكا وإيطاليا واسبانيا الخ ، الاقيني بقول جهراً وسراً الحمد لله علي نعمة بلدنا مصر ، والحمد لله على خير بلدنا مصر ، والحمد لله أننا معندناش رئيس طلع يقولنا (استعدوا لفراق احبابكم) ولا رئيس اخر يقول لنا (القادم أسواء ، واستعدوا لأيام اكثر سواد) ، بلدك ورئيسها قالوها صراحة مش مهم الفلوس ولا الاقتصاد المهم المواطن وصحته وأمنه ، والله لو ركزت شوية هتلاقي عقلك ولسانك بيعملوا زيي ويقولا بشكل تلقائي – عماااااااااااااااار يا مصر .